꧃ꦠꦿꦶꦩ꧅

ꦠꦿꦶꦩꦂꦒꦲꦸꦠꦩ

TRIMA (Tri Marga Utama)
ꦱꦶꦤꦺꦴꦩ꧀
SINOM

Dening: Supriyadi

꧋ꦱꦼꦏꦂꦱꦶꦤꦺꦴꦩ꧀ꦏꦁꦮꦶꦤꦂꦤ

ꦲꦸꦢꦭ꧀ꦭꦶꦁ ꦱꦱ꧀ꦠꦿꦱꦸꦁꦥꦺꦭꦶꦁ

ꦥꦶꦮꦸꦭꦁꦔꦺꦥꦿꦱꦂꦗꦤ

ꦫꦶꦏꦭꦗꦩꦤ꧀ꦏꦮꦸꦫꦶ

ꦲꦶꦁꦱꦼꦢꦾꦠꦸꦂꦲꦸꦢꦤꦶ

ꦪꦺꦏꦸꦠꦺꦏꦢ꧀ꦲꦩꦼꦒꦸꦫꦸ

ꦲꦪ꧀ꦮꦲꦺꦴꦚ꧀ꦕꦠ꧀ꦲꦶꦁꦤꦭ

ꦢꦶꦩꦺꦤ꧀ꦠꦼꦏꦤ꧀ꦔꦺꦭ꧀ꦩꦸꦱꦼꦗꦠꦶ

ꦲꦶꦱ꧀ꦠꦶꦔꦫꦃꦏꦁꦏꦲꦁꦏꦃꦧꦶꦱꦲꦧ꧀ꦰꦃ꧉

Sekar sinom kang winarna
Udaling sastra sung peling
Piwulange pra sarjana
Rikala jaman kawuri
Ing sedya tur udani
Yeku tekad ameguru
Aywa oncat ing nala
Dimen tekan ngelmu jati
Istingarah kang kaangkah bisa absah

ꦠꦿꦶꦩꦂꦒꦲꦶꦁꦏꦁꦲꦸꦠꦩ

ꦲꦸꦠꦩꦤꦺꦮꦺꦴꦁꦩꦂꦱꦸꦢꦶ

ꦔꦸꦥꦢꦶꦲꦸꦫꦶꦥ꧀ꦏꦁꦩꦸꦭ꧀ꦪ

ꦒꦸꦭꦁꦔꦼꦤ꧀ꦫꦶꦤꦭꦤ꧀ꦫꦠꦿꦶ

ꦲꦗꦱꦩꦂꦭꦤ꧀ꦮꦼꦢꦶ

ꦩꦼꦏꦏ꧀ꦲꦮꦭꦮꦤ꧀ꦤꦼꦥ꧀ꦰꦸ

ꦠꦶꦤ꧀ꦢꦏ꧀ꦤꦭꦏꦸꦠꦿꦶꦩ

ꦠꦼꦒꦼꦱ꧀ꦰꦺꦠꦿꦶꦭꦏꦸꦗꦮꦶ

ꦗꦶꦮꦗꦮꦤꦼꦠꦼꦥ꧀ꦥꦶꦭꦏꦸꦱꦠꦿꦶꦪ꧉

Trimarga ingkang utama
Utamane wong marsudi
Ngupadi urip kang mulya
Gulangen rina lan ratri
Aja samar lan wedi
Mekak hawa lawan nepsu
Tindakna laku trima
Tegese tri laku jawi
Jiwa jawa netepi laku satriya

꧋ꦭꦏꦸꦠꦿꦶꦩꦏꦁꦱꦼꦥꦶꦱꦤ꧀

ꦩꦩꦱꦸꦃꦩꦭꦤꦶꦁꦣꦶꦫꦶ

ꦩꦱꦸꦃꦱꦏꦶꦁꦭꦏꦸꦢꦺꦴꦱ

ꦧꦚꦸꦤꦺꦠꦶꦂꦠꦩꦲꦼꦤꦶꦁ

ꦲꦶꦪꦧꦚꦸꦏꦁꦱꦸꦕꦶ

ꦔꦿꦸꦮꦠ꧀ꦥꦏꦂꦠꦶꦢꦶꦪꦸ

ꦲꦶꦪꦠꦶꦂꦠꦥꦮꦶꦠꦿ

ꦤꦸꦭꦠ꧀ꦭꦏꦸꦧꦶꦩꦱꦸꦕꦶ

ꦪꦺꦤ꧀ꦏꦫꦺꦴꦃꦩꦠ꧀ꦨꦶꦱꦠꦩꦠ꧀ꦔꦺꦭ꧀ꦩꦸꦲꦪꦠ꧀

Laku trima kang sepisan
Mamasuh malaning dhiri
Masuh saking laku dosa
Banyune tirta mahening
Iya banyu kang suci
Ngruwat pakartine diyu
Iya tirta pawitra
Nulad laku bima suci
Yen karohmat bisa tamat ngelmu hayat

꧋ꦭꦏꦸꦠꦿꦶꦩꦲꦶꦁꦏꦁꦩꦢꦾ

ꦩꦔꦱꦃꦩꦶꦔꦶꦱ꧀ꦰꦶꦁꦧꦸꦢꦶ

ꦭꦏꦸꦤꦺꦫꦢꦺꦤ꧀ꦗꦤꦏ

ꦲꦶꦪꦧꦼꦒꦮꦤ꧀ꦕꦶꦥ꧀ꦠꦤꦶꦁ

ꦚꦮꦁꦥꦸꦕꦸꦏ꧀ꦏꦶꦁꦲꦂꦢꦶ

ꦤꦼꦥꦶꦲꦶꦁꦫꦺꦴꦁꦔꦶꦁꦧꦸꦢꦾꦪꦸ

ꦩꦼꦤ꧀ꦛꦁꦫꦶꦱꦁꦒꦤ꧀ꦝꦺꦮ

ꦱꦼꦣꦏꦼꦥ꧀ꦤꦼꦁꦩꦭꦢꦶꦤꦶꦁ

ꦔꦶꦏꦼꦠ꧀ꦔꦸꦏꦸꦠꦲꦩꦿꦶꦃꦱꦼꦥꦸꦃꦲꦶꦁꦱꦸꦥꦤ꧉

Laku trima ingkang madya
Mangasah mingising budi
Lakune Raden Janaka
Iya Begawan Ciptaning
Nyawang pucuking hardi
Nepi ing ronging budyayu
Menthang risang gandhewa
Sedhakep neng maladi ning
Ngiket ngukut amrih sepuhing supana

꧋ꦭꦏꦸꦠꦿꦶꦩꦏꦁꦥꦸꦁꦏꦱ꧀ꦰꦤ꧀

ꦩꦩꦪꦸꦲꦪꦸꦤꦶꦁꦱꦩꦶ

ꦭꦏꦸꦧꦛꦫꦏꦽꦱ꧀ꦤ

ꦲꦶꦪꦥꦿꦧꦸꦲꦫꦶꦩꦸꦂꦠꦶ

ꦫꦠꦸꦭꦤ꧀ꦠꦶꦥ꧀ꦰꦂꦠꦲꦢꦶꦭ꧀

ꦩ꧀ꦨꦺꦫꦠ꧀ꦔꦿꦸꦮꦠ꧀ꦰꦏꦺꦃꦱꦠꦿꦸ

ꦠꦤ꧀ꦔꦼꦤ꧀ꦝꦏ꧀ꦒꦸꦤꦶꦁꦗꦭ꧀ꦩ

ꦲꦩꦼꦩꦤꦶꦱ꧀ꦠꦾꦱ꧀ꦰꦩꦶ

ꦲꦩꦂꦱꦸꦢꦶꦩꦂꦢꦶꦩꦂꦠꦠꦩ꧉

Laku trima kang pungkasan
Mamayu hayuning sami
Lakune Bathara Kresna
Iya prabu Harimurti
Ratu lantip sarta adil
Mberat ngruwat sakeh satru
Tan ngendhak gunaning jalma
Hamemanis tyas sesami
Amarsudi mardikaning marta tama

ꦮꦸꦱ꧀ꦥꦸꦂꦤꦩꦏ꧀ꦤꦤꦺꦮꦺꦣ

ꦩꦸꦒꦢꦢꦶꦪꦥꦭꦸꦥꦶ

ꦠꦠꦕꦫꦭꦏꦸꦠꦿꦶꦩ

ꦲꦪ꧀ꦮꦏꦺꦴꦁꦱꦶꦏꦶꦤ꧀ꦠꦶꦂ

ꦢꦶꦠꦠꦭꦮꦤ꧀ꦢꦶꦠꦶꦠꦶ

ꦲꦗꦏꦼꦱꦸꦱꦸꦲꦔꦏꦸ

ꦩꦂꦒꦏꦧꦺꦃꦩꦸꦁꦱꦢꦼꦂꦩ

ꦲꦗꦫꦸꦩꦁꦱꦢꦸꦮꦺꦤꦶ

ꦲꦔꦸꦂꦧꦪꦔ꧀ꦭꦼꦒꦤꦱꦏꦺꦃꦲꦺ꧉

Wus purna maknane wedha
Muga dadiya palupi
Tata cara laku trima
Haywa kongsi kintir
Ditata lawan dititi
Aja kesusu angaku
Marga kabeh mung saderma
Aja rumangsa duweni
Angurbaya nglenggana sakehe dosa

Ngayogyakarta Hadining Art, 23 Maret 2019
*Pernah dimuat di Majalah SEMPULUR
Dinas Kebudayaan DIY

ꦒꦸꦫꦶꦠ꧀ꦭꦸꦔꦶꦠ꧀

3 gagasan untuk “꧃ꦠꦿꦶꦩ꧅”

Tinggalkan Balasan

Alamat email Anda tidak akan dipublikasikan. Ruas yang wajib ditandai *