꧃ꦮꦼꦭꦶꦁꦱꦶꦤꦁꦔ꧀ꦭꦶꦁ꧅

꧃ꦮꦼꦭꦶꦁꦱꦶꦤꦁꦔ꧀ꦭꦶꦁ꧅

꧋ꦫꦶꦏꦭꦏꦸꦩ꧀ꦨꦁꦲꦔꦶꦱꦼꦥ꧀ꦱꦫꦶꦤꦶꦁꦏꦼꦩ꧀ꦨꦁ

ꦧꦽꦔꦼꦔꦼꦁꦲꦚ꧀ꦗꦿꦃꦲꦶꦁꦠꦮꦁ

ꦲꦔꦿꦶꦥ꧀ꦠꦏꦶꦢꦸꦁꦲꦒꦸꦁ

ꦲꦁꦒꦸꦫꦠ꧀ꦒꦸꦫꦶꦠ꧀ꦮꦸꦪꦸꦁ

ꦊꦒꦶꦒꦃꦭꦤꦺꦥ꧀ꦰꦥ

ꦩꦮꦂꦠꦥꦔꦺꦤ꧀ꦛꦠꦤꦮꦸꦃꦫꦱ

ꦲꦺꦤ꧀ꦢꦃꦲꦺꦢꦶꦏꦁꦱꦶꦤꦮꦁ

ꦩꦂꦧꦸꦏ꧀ꦲꦫꦸꦩ꧀ꦏꦁꦒꦶꦤꦣꦁ

ꦱꦶꦤꦂꦠꦤ꧀ꦲꦔꦶꦤ꧀ꦩꦶꦢꦶꦢ꧀ꦝꦸꦩꦮꦃꦲꦶꦁꦠꦮꦁꦠꦺꦴꦮꦁ

ꦢꦪꦕꦶꦥ꧀ꦠꦩꦚ꧀ꦗꦶꦭꦔꦼꦒꦸꦁꦏꦺꦲꦾꦁꦩꦲꦩꦸꦭ꧀ꦪ

ꦔꦿꦏꦶꦠ꧀ꦲꦸꦏꦫꦩꦿꦤꦠꦧꦱ

ꦩꦔꦺꦴꦭꦃꦫꦱꦩ꧀ꦨꦧꦂꦢꦂꦩ

ꦩꦸꦫꦶꦃꦲꦪꦸꦫꦲꦪꦸꦤꦶꦁꦱꦼꦱꦩ

ꦒꦩ꧀ꦨꦂꦫꦤ꧀ꦲꦸꦫꦶꦥ꧀ꦫꦶꦤꦶꦥ꧀ꦠꦲꦶꦁꦠꦸꦭꦶꦱ꧀

ꦢꦢꦶꦪꦢꦪꦥꦶꦮꦼꦭꦶꦁꦏꦁꦱꦶꦤꦁꦔ꧀ꦭꦶꦁ

ꦲꦺꦭꦶꦁꦗꦁꦏꦤꦺꦲꦺꦭꦶꦁꦣꦁꦏꦤꦺ꧉

ꦠꦩꦤ꧀ꦒꦸꦫꦶꦠ꧀ꦥꦺꦴꦗꦺꦴꦏ꧀ꦢꦺꦱ꧇꧑ꦤꦺꦴꦮ꦳ꦺꦩ꧀ꦨꦼꦂ꧇꧒꧐꧑꧘꧇

WELING SINANGLING

Dening: Supriyadi, S.Fil.

Rikala kumbang angisep sarining kembang
Brengengeng anjrah ing tawang
Angripta kidung agung
Anggurat gurit wuyung
Legi gulaning puspa
Mawarna pangentha tuwuh rasa
Endah, edi kang sinawang
Marbuk arum kang ginadhang
Sinartan angin midid dhumawah ing
tawang towang
Daya cipta manjila ngegungake
Hyang Maha Mulya
Ngrakit ukara mranata basa
Mangolah rasa mbabar darma 
murih hayu rahayuning sasama
Gambaran urip rinipta ing tulis
Dadiya daya piweling kang sinangling
Eling jangkane, eling dhangkane.

Taman Gurit Pojok Desa, 1 November 2018

ꦒꦸꦫꦶꦠ꧀ꦭꦸꦔꦶꦠ꧀

꧃ꦏꦭꦶꦩꦠꦪ꧅

KALIMATAYA(ꦏꦭꦶꦩꦠꦪ)

Dening Supriyadi, S. Fil. 

꧋ꦫꦶꦏꦭꦢꦺꦴꦚꦮꦸꦱ꧀ꦲꦺꦴꦤ꧀ꦠꦿꦤ꧀ꦲꦺꦴꦤ꧀ꦠꦿꦤ꧀
Rikala donya wus ontran—ontran
ꦲꦏꦺꦃꦩꦤꦸꦁꦱꦥꦣꦉꦒꦼꦗꦼꦒ꧀ꦒꦤ꧀
Akeh manungsa padha regejegan
ꦧꦧꦒꦤ꧀ꦩꦶꦭꦶꦏ꧀ꦏꦁꦩꦸꦁꦱꦒꦼꦧꦾꦂꦫꦤ꧀
Babagan milik kang mung sagebyaran
ꦠꦂꦠꦩ꧀ꦠꦸꦲꦺꦴꦫꦱꦶꦛꦶꦏ꧀ꦲꦁꦒꦮꦏꦺꦴꦂꦧꦤ꧀
Tartamtu ora sithik anggawa korban
ꦕꦺꦴꦏꦺꦴꦠ꧀ꦕꦺꦴꦏꦺꦴꦠꦤ꧀
Cakot—cakotan, 
ꦕꦏꦂꦕꦏꦂꦫꦤ꧀
Cakar—cakaran, 
ꦲꦼꦤꦠꦸꦥ꧀ꦲꦼꦤ꧀ꦠꦸꦥꦤ꧀
Entup—entupan, 
ꦒꦸꦢꦏ꧀ꦒꦸꦢꦏ꧀ꦏꦤ꧀
Gudak—gudakan, 
ꦏꦪꦥꦺꦴꦭꦃꦲꦺꦏꦺꦮꦤ꧀ꦲꦺꦴꦫꦔꦼꦂꦠꦶꦠꦠꦤꦤ꧀
Kaya polahe kewan ora ngerti tatanan
ꦲꦱꦺꦴꦂ
Asor
ꦲꦶꦤ
Ina
ꦩꦸꦱ꧀ꦥꦿꦏꦁꦏꦗꦺꦴꦁꦏ
Muspra kang kajangka
ꦲꦩꦂꦒꦔꦸꦏꦸꦃꦲꦶꦧꦫꦁꦏꦁꦲꦺꦴꦚ
Amarga ngukuhi barang kang onya
ꦲꦭꦩ꧀ꦩꦺꦭꦸꦲꦺꦴꦉꦒ꧀
Alam melu horeg
ꦔꦺꦭꦶꦁꦏꦺꦩꦤꦸꦁꦱꦏꦁꦥꦣꦲꦸꦢꦿꦼꦒ꧀
Ngelingke manungsa kang padha udreg
ꦏꦺꦴꦂꦧꦤ꧀ꦩ꧀ꦧ꧀ꦭꦱꦃꦥꦠꦶꦁꦗꦼꦁꦒꦼꦊꦒ꧀
Korban mblasah pating jenggeleg
ꦏꦶꦤꦂꦪꦩꦱꦸꦃꦏꦁꦥꦣꦊꦛꦼꦒ꧀
Kinarya masuh kang padha letheg
ꦱꦶꦂꦤꦤꦺꦏꦭꦧꦼꦤ꧀ꦢꦸ
Sirnane kalabendu
ꦥꦫꦏꦮꦸꦭꦥꦣꦒꦤꦩꦸꦪꦸ
Para kawula padha gumuyu
ꦩꦥꦏ꧀ꦗꦩꦤ꧀ꦏꦭꦱꦸꦧ
Mapak jaman kalasuba
ꦮꦺꦴꦁꦱꦭꦃꦧꦏꦭ꧀ꦭꦺꦱꦺꦭꦺꦃ
Wong salah bakale seleh
ꦮꦺꦴꦁꦗꦲꦶꦭ꧀ꦨꦏꦭ꧀ꦏꦼꦮꦼꦭꦺꦃ
Wong jail bakal keweleh
ꦲꦺꦫꦸꦕꦏꦿꦠꦤ꧀ꦥꦒꦼꦤ꧀ꦢꦺꦫ
Heru Cakra tanpa gendera
ꦩ꧀ꦨꦧꦂꦏꦩꦸꦭ꧀ꦪꦤ꧀ꦭꦼꦱ꧀ꦠꦫꦶꦩꦼꦂꦢꦶꦏ
Mbabar kamulyan lestari merdika
ꦗꦪꦮꦶꦗꦪꦤ꧀ꦠꦶ
Jaya wijayanti
ꦱꦸꦫꦢꦶꦫꦗꦪꦤꦶꦁꦫꦠ꧀ꦭꦼꦧꦸꦂꦢꦺꦤꦶꦁꦥꦔꦱ꧀ꦠꦤꦠꦶ
Sura dira jayaningrat lebur dening pangastuti.

ꦲꦺꦴꦩꦃꦗꦺꦴꦒ꧀ꦭꦺꦴ ꧇꧑꧔꧇ꦲꦒꦸꦱ꧀ꦠꦸꦱ꧀꧇꧒꧐꧑꧘꧇
Omah Joglo, 14 Agustus 2018
ꦏꦢꦁꦥꦫꦩꦂꦠ ꦥ꧉ꦱ꧉ꦗ꧉ ꦧꦤ꧀ꦠꦸꦭ꧀
Kadang Paramata PSJ Bantul

ꦒꦸꦫꦶꦠ꧀ꦭꦸꦔꦶꦠ꧀

꧁ꦏꦿꦶꦣꦢꦂꦩ꧂

꧋ꦱꦸꦩꦶꦭꦏ꧀ꦨꦿꦁꦮꦺꦠꦤ꧀ꦔ꧀ꦒꦼꦤ꧀ꦛꦺꦴꦫꦺꦴꦁ꧈

ꦲꦸꦢꦾꦤꦔꦩ꧀ꦨꦂꦲꦫꦸꦩ꧀ꦲꦩꦿꦶꦏ꧀ꦰꦼꦏꦂꦩꦚ꧀ꦕꦮꦂꦤ꧈

ꦥꦿꦗꦭ꧀ꦩꦒꦸꦩꦿꦺꦒꦃꦚ꧀ꦗꦼꦗꦼꦒ꧀ꦒꦺꦥꦺꦴꦭꦃ꧈

ꦫꦶꦏꦠ꧀ꦩꦁꦏꦠ꧀ꦲꦭꦸꦫꦸꦫꦒꦢ꧀꧈

ꦲꦶꦁꦱꦼꦒꦫꦥꦔꦸꦸꦫꦶꦥ꧀ꦥꦤ꧀ꦏꦁꦏꦼꦧꦏ꧀ꦥꦕꦺꦴꦧꦤ꧀꧈

ꦪꦼꦏ꧀ꦠꦶꦏꦸꦢꦸꦠꦤ꧀ꦰꦃꦲꦺꦭꦶꦁꦭꦤ꧀ꦮꦱ꧀ꦥꦢ꧈

ꦲꦩꦿꦶꦃꦪꦸꦮꦤꦱꦏꦺꦃꦲꦶꦁꦏꦸꦥꦶꦪ꧈

ꦢꦺꦴꦔꦭꦶꦤꦩ꧀ꦨꦂꦫꦤ꧀ꦭꦏꦸꦱꦼꦁꦏꦸꦠ꧀ꦒꦸꦩꦿꦼꦒꦸꦠ꧀꧈

ꦅꦱ꧀ꦠꦶꦔꦫꦃꦒꦸꦱ꧀ꦠꦶꦉꦤꦭꦶꦭꦤꦩ꧀ꦥꦠꦤ꧀ꦥꦔ꧀ꦒꦽꦱꦸꦭ꧉

Sumilak brang wetan nggenthorong,
Udyana ngambar arum amrik sekar manca warna,
Prajalma gumregah njejege polah,
Rikat mangkat aluru ragat,
Ing segara panguripan kang kebak pacoban,
Yekti kudu tansah eling lan waspada,
Amrih yuwana sakehing kupiya,
Donga linambaran laku sengkut gumregut
Istingarah Gusti rena lila nampa tanpa nggresula.

Ngayogyakarta Hadining Art, 19 April 2017

ꦫꦣꦶꦪꦺꦴꦕꦩ꧀ꦥꦸꦂꦱꦫꦶ
ꦔꦪꦺꦴꦒꦾꦏꦂꦠ



ꦩꦔꦸꦭꦃꦔꦺꦭ꧀ꦩꦸꦧꦁꦏꦶꦠ꧀